Click here for English version

Kushtet e pranimit në programin konkret të studimit

Diplomë Bachelor në Informatikë Ekonomike të Fakultetit të Ekonomisë, UT ose të fakulteteve të tjera në IAL (publike/jopublike–vendase/të huaja).

Diplomë Bachelor në Informatikë,  Shkenca Kompjuterike, Teknologji Informacioni, Inxhinieri Informatike dhe degë të tjera të ngjashme në fakultete të tjera të IAL (publike/jopublike–vendase/të huaja) mund të pranohen pasi të jetë kryer njohja e diplomave të tyre sipas rregulloreve përkatëse të Fakultetit të Ekonomisë, UT dhe pas plotësimit të njohurive të tyre formuese.

Objektivat dhe veprimtaritë formuese të programit të studimit

Programi i studimit ka për qëllim të formojë profesionistë në fushën e sistemeve të informacionit, të aftë të integrojnë zgjidhjet që ofron teknologjia e informacionit me ato të proceseve të biznesit për të plotësuar nevojat për informacion të biznesit dhe të ndërmarrjeve të tjera, duke u mundësuar atyre arritjen e objektivave të tyre në një mënyrë efektive dhe efiçiente.

Objektivat e programit të studimit:

• Të diplomuarit do të jenë të aftë të planifikojnë, drejtojnë, organizojnë dhe marrin pjesë në grupe pune dhe projekte në grup që mundësojnë arritjen e zgjidhjeve të suksesshme të sistemeve të informacionit brenda organizatës;

• Të diplomuarit do të mund të fitojnë aftësitë për të komunikuar dhe bashkëpunuar me persona në role të ndryshme të sistemeve të informacionit si përdorues, menaxherë, zhvillues, analistë dhe administratorë rrjeti/baze të dhënash;

• Të diplomuarit do të fitojnë mundësinë për të kuptuar funksionet dhe aplikimet e kompjuterave në mjedisin e sistemeve të informacionit dhe të aplikojnë këtë kuptueshmëri brenda organizatës dhe strukturave dhe proceseve të biznesit;

• Të diplomuarit do të mund të arrijnë të zgjidhin probleme ekonomike duke identifikuar, analizuar, zhvilluar dhe implementuar zgjidhje bazuar në sistemet e informacionit;

• Të diplomuarit do të fitojnë aftësinë për të mirëmbajtur njohuritë aktuale të metodologjive dhe teknologjive të sistemeve të reja të informacionit për të adresuar nevojat kritike të biznesit në lidhje me kërkesat, qëllimet strategjike dhe veprimet e përditshme;

• Të diplomuarit do të mund të tregojnë aftësinë për të kuptuar dhe aplikuar konsiderata etike ndaj problemeve të ndryshme në mjedisin e sistemeve të informacionit;

• Të diplomuarit do të mund të zhvillojnë aftësitë mbi planifikimin analitik, strategjik e kërkimor dhe menaxhimin e projekteve.

Veprimtaritë formuese:

1. Lëndë të formimit të përgjithshëm: Metoda Kërkimi, Kërkime Operacionale.

2. Lëndë të formimit karakterizues: Programim i Avancuar në Web, E-Tregëtia / E – Biznes, Analizë dhe Projektim i Bazave të të Dhënave, Analizë e Serive Kohore, Inxhinjeri Softuerësh, Modelim në Biznes, Analizë dhe Projektim i Sistemeve të Informacionit, Inteligjencë Artificiale.

3. Lëndë integruese: Seminar Special në Ekonomi, Aplikime Mobile.

4. Lëndë me zgjedhje: Menaxhimi i Njohurive, Sistemet e Shpërndara, Sisteme Informacioni në Kontabilitet, E-Marketing, Menaxhimi i Projekteve TI, Analiza e të Dhënave, Kontrolli i Cilësisë Statistikore, Teoria e Lojrave, Metoda Simulimi në Biznes, Kontabilitet Kosto, Drejtimi, Tregje dhe Institucione Financiare, Siguria e Sistemeve të Informacionit, Kriptografia, Datamining, Procesimi i Imazheve, GIS.

5. Praktika.

6. Projekti kërkimor dhe teza.

Skema e vlerësimit

Shkalla e përvetësimit të programit mësimor vlerësohet me sistem notash nga 1 në 10, ku notat kanë kuptimin e mëposhtëm: 1-4 mbetës, 5 mjaftueshëm, 6 kënaqshëm, 7-8 mirë, 9 shumë mirë, 10 shkëlqyer.